Шийдвэрийн дэлгэрэнгүй

Шийдвэрийн төрөл Шийтгэх тогтоол
Огноо 2019-03-13
Дугаар 2019/ШЦТ/85
Хэргийн индекс 171/2019/0088/Э
Шүүх Орхон аймаг дахь сум дундын эрүүгийн хэргийн анхан шатны шүүх
Шүүгч Даваасүрэнгийн Ариунцэцэг
Шүүгдэгч Н.Амгаланбаяр
Зүйл хэсэг 11.6.2. - Хүний эрүүл мэндэд хөнгөн хохирол учруулах
Улсын яллагч Б.Жавхлантуяа
Хүчинтэй эсэх Тийм
Шийдвэрийн товч

                          

                                         МОНГОЛ УЛСЫН НЭРИЙН ӨМНӨӨС

Орхон аймаг дахь Сум дундын Эрүүгийн хэргийн анхан шатны шүүхийн шүүх хуралдааныг ерөнхий шүүгч Д.Ариунцэцэг даргалж

Шүүх хуралдааны нарийн бичгийн дарга Б.Алтаншагай

Улсын яллагч Б.Жавхлантуяа

Шүүгдэгч Н.А нарыг оролцуулан Орхон аймгийн Прокуророос Эрүүгийн хуулийн тусгай ангийн 11.6  дугаар зүйлийн 2 дахь хэсэгт заасан “гэр бүлийн хүчирхийлэл үйлдэж хүний эрүүл мэндэд хөнгөн хохирол учруулах” гэмт хэрэгт холбогдуулан яллах дүгнэлт үйлдэж ирүүлсэн Н.Ат холбогдох эрүүгийн 1925000520090 дугаартай хэргийг тус шүүхийн танхимд нээлттэй хянан хэлэлцэв.

 

Шүүгдэгч: Монгол Улсын иргэн, Н.А

Орхон аймгийн Прокуророос, шүүгдэгч Н.Аыг 2019 оны 01 сарын 07-ны өдөр Орхон аймгийн Баян-Өндөр сум Дэнж багийн баруун дэнжийн 16-9 тоотод эхнэр М.Мөнхзулыг гэр бүлийн хүчирхийлэл үйлдэж зодон эрүүл мэндэд нь хөнгөн хохирол учруулсан гэмт хэрэгт холбогдуулан Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар яллах дүгнэлт үйлдэж шүүхэд шилжүүлжээ.

ТОДОРХОЙЛОХ НЬ:

 Шүүхийн хэлэлцүүлэгт шүүгдэгч Н.Аын мэдүүлсэн: Би гэм буруугаа хүлээж байна. Харамсаж байна. Би архи уусан байсан. Эхнэр 2 өдөр архи ууж алга болсон тул ийм юм болсон. Миний үйлдлийн улмаас хохирол учирсныг хүлээн зөвшөөрч, үр дагаварыг нь ойлгож байна гэх мэдүүлэг болон  хавтаст хэргээс яллах дүгнэлтийн хавсралтад заасан дараахь нотлох баримтуудыг шинжлэн судлав.Үүнд:

- Хохирогч М.Мөнхзулын мөрдөн байцаалтад мэдүүлсэн: 2019 оны 01-р сарын 07-ны өдөр би найз Баярбаясгалан, Золзаяа бид нар найз Байгалийн гэрт очоод тэнд жаахан юм ярьж сууж байхад манай нөхөр Амгаланбаяр над руу утсаар дахин дахин залгаад хаана байна, хурдан гэртээ ир гээд утсаар яриад байхаар нь би Байгалийн гэрээс орой 20 цагийн үед гараад ганцаараа гэртээ ирэхэд нөхөр Амгаланбаяр нь найз Алтанхуягийн хамт архи уусан бололтой байж байсан. Алтанхуяг нь гал тогооны ширээг дэрлээд унтаж байсан ба Амгаланбаяр намайг дөнгөж гэрийн хаалгаар орж ирэхэд хаагуур яваад ирж байгаа юм бэ гээд нэг удаа гараараа алгадсан. Тэгээд үүдэнд байсан шалны модоор нуруу руу цохитол шалны мод хугарсан, Амгаланбаяр шалны модоо хаяаад шууд намайг үсдэж аваад газар унагаагаад шалан дээр чирээд дээрээс гуталтай хөлөөрөө 2 удаа дэвсээд гал тогооны өрөөний ширээг дэрлээд унтаж байсан Алтанхуягийг сэрээгээд, чи янханаа дууд, та нарыг бүгдийг чинь ална гээд орилоод байсан. Тэр үед Алтанхуяг сэрээд Амгаланбаярыг болиоч гэж хэлтэл Амгаланбаяр Алтанхуягийн нүүрэн тус газар нь нэг удаа гараараа цохиод цааш болгосон. Намайг тэр үед үснээс зулгаагаад тавихгүй болохоор нь би Алтанхуягийг цагдаа дууд гэж хэлтэл Алтанхуяг өөрөө нилээн согтолттой надад утас байхгүй, чи надад утсаа өгчих гэж хэлээд хөл дээрээ тогтохгүй байсан. Амгаланбаяр миний үсийг тавихгүй болохоор нь би өөрөө гар утсаараа Амгаланбаярын төрсөн эгч болох Цэрэндолгор руу залгасан боловч утсаа аваагүй. Аргагүйн эрхэнд өөрийн төрсөн дүү болох Мөнхбат руу залгаж аваарай, туслаарай гэж орилоод утсаа тасалж чадаагүй Амгаланбаярын гарыг нь тавиулах гэж нилээн оролдсон боловч чадаагүй. Удалгүй манай дүү Мөнхбат гэрт орж ирэхэд Амгаланбаяр миний үснээс зулгаасан чигээрээ гуталтай хөлөө миний шанаан дээр тавьчихсан зогсож байтал Мөнхбат шууд Амгаланбаяр дээр очоод чи яахаараа дандаа архи уухаараа асуудал үүсгэдэг юм бэ гэж хэлээд таттал Амгаланбаяр арагшаа газар унасан... гэх мэдүүлэг /хх-ийн 5-8-р хуудас/

-Шүүхийн шижилгээний албаны шинжээчийн 2019 оны 01 сарын 11-ний өдрийн 89 дугаартай шинжээчийн... М.Мөнхзулын биед тархи доргилт, нүүр, баруун бугалга, хуйханд зөөлөн эдэд цус хуралт бүхий гэмтэл тогтоогдлоо. Эдгээр гэмтэл нь мохоо зүйлийн олон удаагийн үйлчлэлээр үүсгэгдэнэ. Эрүүл мэндийг түр хугацаагаар сарниулна. Тархи доргилт нь шүүх эмнэлгийн гэмтлийн зэрэг тогтоох журмын 2.4.1-д заасны дагуу гэмтлийн хөнгөн зэрэгт хамаарагдана, бусад гэмтэл нь шүүх эмнэлгийн гэмтлийн зэрэг тогтоох журмын 2.6-д заасны дагуу гэмтлийн зэрэгт хамаарагдахгүй. Гоо сайхан болон ерөнхий хөдөлмөрийн чадвар алдалтанд нөлөөлөхгүй. Шинэ гэмтэл байна”... гэх дүгнэлт /10-р хуудас/

 

-Гэрч М.Мөнхбаярын... “2019 оны 01 дүгээр сарын 07-ны өдөр манай эгч М.Мөнхзулыг нөхөр Амгаланбаяр нь архи согтууруулах ундааны зүйл хэрэглэсэн үедээ гэртээ зодоод байхаар нь манай эгч Мөнхзул нь дүү Мөнхбатыг дуудаад салгасан байсан. Тухайн үед Мөнхбат эгчийг өмөөрөөд Амгаланбаярыг цааш нь түлхээд газар унангуут цээж рүү нь хөлөөрөө өшиглөх гэж байгаад нүүр рүү нь өшиглөчихсөн. Тэгээд Мөнхбат ах цагдаа дуудаад би гэрээсээ яваад очтол эгч Мөнхзулын үснээс нь зулгаачихсан үс нь сэгсийгээд арзайчихсан, хоёр нүдний орчимд бага зэрэг хөхөрчихсөн байсан. Харин нөхөр Амгаланбаярын хамарнаас нь цус гарчихсан согтуу харагдаж байсан”... гэх мэдүүлэг /хх-ийн 17-18-р хуудас/

-Гэрч А.Байгалмаагийн... “Маргааш нь би Мөнхзултай утсаар ярьтал өчигдөр манайд бөөн юм болоод Мөнхбат, Амгалан хоёр зодоон хийгээд цагдаа шүүх болсон. Миний нүд ам бас хөхөрөөд хавдчихсан гэж хэлж байсан”... гэх мэдүүлэг  /хх-ийн 22-р хуудас/

 

-Гэрч Н.Алтанхуягийн... “ Би хоол унд идчихээд тэр архинаас нь уугаад сууж байхад Амгаланбаяр эхнэр Мөнхзул руу байн байн утсаар залгаж хаана явж байгаа юм, хурдан ир пизда минь, янхан минь гээд уурлаад байсан. Би тухайн үед нилээн согтуу байсан болохоор орон дээр унтаад өгсөн. Нэг сэрсэн чинь Амгаланбаяр намайг босоод ир гээд байх шиг байхаар нь босоод иртэл шууд миний нүүрэн тус газар гараараа цохиж аваад чи тэр янханыгаа олж ир, би та гурвыг өнөөдөр ална гээд нөгөө гараараа эхнэр Мөнхзулын үсийг гартаа ороочихсон газар унагаагаад гуталтай хөлөө нүүрэн дээр нь тавьчихсан харагдаж байсан. Би тухайн үед юу болж байгаагаа ойлгохгүй нүүрээ дараад босож ирээд найз Амгаланбаярыг салгах гэтэл намайг цааш нь түлхэж унагаагаад өөртөө ойртуулахгүй байхаар нь би Мөнхзулд хандаж чи ядаж ах дүү нар руу нь залгаад хүрээд ир гээд хэлчих гэж хэлэхэд Мөнхзул үсээ зулгаалгуулсан чигтээ өөрийнхөө утсаар Амгаланбаярын ах дүү нар руу нь залгасан боловч хэн нь ч утсаа аваагүй. Тэгэхээр нь цагдаа дууд гээд Мөнхзулд хэлсэн. Тэгтэл удалгүй гаднаас Мөнхзулын төрсөн дүү Мөнхбат орж ирэхэд Амгаланбаяр Мөнхзулыг үсэдсэн чигээрээ зогсож байсан. Тэгтэл Мөнхбат Амгаланбаярт хандаж чи яагаад дандаа миний эгчийг ингэж дарамталдаг юм бэ гээд очоод салгах гэтэл Амгаланбаяр Мөнхбатын нүүрэн тус газар гараараа нэг удаа цохиод авахаар нь Мөнхбат Амгаланбаярыг цааш нь түлхсэн”... гэх мэдүүлэг /хх-ийн 28-30-р хуудас/

-Гэрч М.Мөнхбатын... “Утсаар эгч Мөнхзул авраарай, туслаарай гэж ярьсан болохоор би гэрт нь очсон. Намайг гэрт нь ороход Амгаланбаяр согтуу эхнэр Мөнхзулын үснээс зулгаагаад газар унагаачихсан байхаар нь би очиж салгасан”... гэх мэдүүлэг /хх-ийн 31-р хуудас/

-Аюулын зэргийн үнэлгээ тогтоосон маягт /хх-ийн 34- хуудас/

-Гэр бүлийн хүчирхийллийн нөхцөл байдлын үнэлгээний маягт /хх-ийн 37-45-р хуудас/.

Шүүхийн хэлэлцүүлэгт шинжлэн судалсан хохирогчийн мэдүүлэг, гэрчүүдийн мэдүүлэг, шинжээчийн дүгнэлт зэрэг эдгээр нотлох баримтыг Эрүүгийн хэрэг хянан шийдвэрлэх тухай хуульд заасан журмаар цуглуулж бэхжүүлсэн хууль ёсны, үйл баримтын талаархи мэдээллийг агуулсан байх тул хэрэгт хамааралтай, хэргийн бодит байдлыг тогтооход ач холбогдолтой, шүүгдэгчийн гэм буруугийн талаар дүгнэлт хийхэд хангалттай гэж үзэв.

Дээрхи хохирогч, гэрчүүдийн мэдүүлэг, шинжээчийн дүгнэлт, хэргээ хүлээн мэдүүлсэн шүүгдэгчийн мэдүүлэг зэрэг нотлох баримтуудаар шүүгдэгч Н.А нь 2019 оны 01 сарын 07-ны өдөр архидан согтуурсан үедээ Орхон аймгийн Баян-Өндөр сум Дэнж багийн баруун дэнжийн 16-9 тоотод өөрийн гэртээ эхнэр М.Мөнхзулыг гэр бүлийн хүчирхийлэл үйлдэн зодож биед нь тархи доргилт, нүүр, баруун бугалга, хуйханд зөөлөн эдэд цус хуралт бүхий хөнгөн зэргийн хохирол учруулсан үйл баримт тогтоогдож байна. Шүүгдэгчийн үйлдлийн улмаас хохирогчийн биед хөнгөн гэмтэл хохирол учирсан шууд шалтгаант холбоотой болох нь тогтоогдсон, шүүгдэгч гэм буруугийн талаар маргахгүй байна.

Улсын яллагч шүүх хуралдаанд: Шүүгдэгч 2019 оны 01 сарын 07-ны өдөр архидан согтуурсан үедээ Орхон аймгийн Баян-Өндөр сум Дэнж багийн баруун дэнжийн 16-9 тоотод эхнэр М.Мөнхзулыг гэр бүлийн хүчирхийлэл үйлдэж зодон эрүүл мэндэд нь хөнгөн хохирол учруулсан болох нь тогтоогдсон. Гэрчүүдийн мэдүүлэг байгаа. Шүүгдэгч гэм буруугаа хүлээн зөвшөөрсөн. Эрүүгийн хуулийн 11.6 дугаар зүйлийн 2 дахь хэсэгт заасан гэмт хэрэг үйлдсэн гэм буруутайд тооцож 600 нэгжтэй тэнцэх хэмжээний төгрөгөөр торгох ял оногдуулах саналтай байна гэжээ.

Шүүгдэгч өөрийгөө өмгөөлж хэлэхдээ: Би гэм буруугаа хүлээж байна. Ялын саналыг зөвшөөрч байна гэжээ.

Хохирогч М.Мөнхзул шүүх хуралдаанд оролцоогүй, гомдолгүй, нэхэмжлэх зүйлгүй гэж шүүхэд мэдэгджээ.

Шүүгдэгч Н.Аын энэ үйлдэл Эрүүгийн хуулийн тусгай ангид заасан гэр бүлийн хүчирхийлэл үйлдэж хүний эрүүл мэндэд хөнгөн хохирол учруулах гэмт хэргийн шинжтэй санаатай, нийгэмд аюултай, бусдад хохирол учруулсан үйлдэл мөн бөгөөд прокурорын яллах дүгнэлт үндэслэлтэй байна. Иймд Эрүүгийн хуулийн 2.1 дүгээр зүйлд “Энэ хуулийн тусгай ангид заасан, нийгэмд аюултай, гэм буруутай үйлдэл, эс үйлдэхүйг гэмт хэрэгт тооцно” гэж, 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд...эрүүгийн хариуцлага хүлээлгэнэ” гэж заасны дагуу шүүгдэгч Н.Аыг гэмт хэрэг үйлдсэн гэм буруутайд тооцож, эрүүгийн хариуцлага хүлээлгэх үндэслэлтэй.       

Шүүгдэгч хэргийг хялбаршуулсан журмаар шийдвэрлүүлэхээр хүсэлт гаргаж ялын төрөл хэмжээний тухай улсын яллагчийн саналыг зөвшөөрч гарын үсэг зурсан байх ба шүүгдэгчийн гэм буруутай байдал нотлогдож тогтоогдсон тул ял шийтгэгдсэн эсэхийг шалгасан хуудас, хувийн байдлыг тодорхойлсон баримтууд зэргийг шинжлэн судлаж хэргийн нөхцөл байдал, гэм буруугаа хүлээсэн байдал, шүүгдэгчийн хувийн байдал, улсын яллагчийн санал зэргийг харгалзан эрүүгийн хариуцлага хүлээлгэх нь үйлдсэн хэргийн гэм бурууд тохирно гэж дүгнэж шийдвэрлэв.

           Шүүгдэгч Н.А нь хөдөлмөр эрхэлдэг, тогтмол орлоготой байх тул оногдуулсан ялыг хэсэгчлэх шаардлагагүй гэж үзлээ.

Энэ хэрэгт эд мөрийн баримт хураагдаагүй, хөрөнгө битүүмжлэгдээгүй, шүүгдэгч цагдан хоригдоогүй, төлөх төлбөргүй, хэрэг хянан шийдвэрлэх ажиллагааны зардал нэхэмжлээгүйг дурьдлаа.

Монгол Улсын Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 1, 17.5 дугаар зүйлийн 1 дэх хэсэг, 36.2, 36.6, 36.7, 36.8, 36.10 дугаар зүйлүүдэд тус тус заасныг удирдлага болгон

ТОГТООХ НЬ:

1.Шүүгдэгч Н.А-г Эрүүгийн хуулийн 11.6 дугаар зүйлийн 2 дахь хэсэгт заасан гэр бүлийн хүчирхийлэл үйлдэж хүний эрүүл мэндэд хөнгөн хохирол учруулах гэмт хэрэг үйлдсэн гэм буруутайд тооцсугай.

2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгч Н.Аыг 600 нэгжтэй тэнцэх хэмжээний буюу 600,000 /зургаан зуун мянган / төгрөгөөр торгох ялаар шийтгэсүгэй.

3.Эрүүгийн хуулийн ерөнхий ангийн 5.3 дугаар зүйлийн 4,5 дахь хэсэгт зааснаар Н.Ат оногдуулсан торгох ялыг шийтгэх тогтоол хүчин төгөлдөр болсноос хойш 1 сарын хугацаанд бүрэн хэмжээгээр төлөхөөр тогтоож, шүүхээс тогтоосон хугацаанд ялыг биелүүлээгүй бол хорих ялаар солихыг мэдэгдсүгэй.        

4.Шийтгэх тогтоол хүчин төгөлдөр болтол шүүгдэгч Н.Ат урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

5.Энэ хэрэгт эд мөрийн баримтаар хураагдаж ирсэн зүйлгүй, битүүмжилсэн хөрөнгөгүй, шүүгдэгч цагдан хоригдоогүй, төлөх төлбөргүй, хэрэг хянан шийдвэрлэх ажиллагааны зардал нэхэмжлээгүйг дурьдсугай.

            6.Шийтгэх тогтоол уншин сонсгосноор хүчинтэй болох бөгөөд шүүгдэгч, хохирогч, тэдгээрийн өмгөөлөгч нар эс зөвшөөрвөл шийтгэх тогтоолыг гардан авснаас хойш 14 хоногийн дотор Орхон аймгийн Эрүүгийн хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй.

 

                    ДАРГАЛАГЧ, ЕРӨНХИЙ ШҮҮГЧ                            Д.АРИУНЦЭЦЭГ

 

 

 

 

 

 

 

 

 

 

 

 

 

 

 

 

Шийдвэр бүрэн эхээрээ
Шийдвэрийг бүрэн эхээр нь үзэхийн тулд манай сайтад нэвтэрсэн байх шаардлагaтай.
Ta энд дарж нэвтэрнэ үү.